Ýurdumyzyň Garaşsyzlygy, hemişelik Bitaraplygy döwletimize dünýä ýurtlary bilen hoşniýetli dost-doganlyk gatnaşyklarynyň gerimini giňeltmäge ýardam berýär. Şu nukdaýnazardan hem, ýurdumyz özüniň hemişelik Bitaraplyk hukuk ýagdaýyna esaslanyp, sebitde we dünýäde parahatçylygy goldamak boýunça nusgalyk işlerini dowamly alyp barýar.
2007-nji ýylyň dekabrynda Türkmenistanyň başlangyjy boýunça paýtagtymyzda Birleşen Milletler Guramasynyň Merkezi Aziýa üçin öňüni alyş diplomatiýasy boýunça sebit merkezi açyldy. Merkez sebit döwletleriniň, Birleşen Milletler Guramasynyň we onuň düzümleriniň, şeýle hem beýleki gyzyklanma bildirýän taraplaryň parahatçylyk we howpsuzlyk meseleleri babatda özara hereketlerini utgaşdyrmaga gönükdirilendir. Ynha, şu ýyl Birleşen Milletler Guramasynyň Baş Assambleýasy tarapyndan «Merkezi Aziýa — parahatçylyk, ynanyşmak we hyzmatdaşlyk zolagy» atly Kararnamanyň kabul edilmegi hem aýratyn bellenmäge mynasypdyr. Munuň özi ýurdumyzyň Birleşen Milletler Guramasy bilen hyzmatdaşlygynyň strategik we netijeli häsiýete eýe bolýandygynyň aýdyň beýanydyr.