Berkarar döwletiň täze eýýamynyň Galkynyşy döwründe Garaşsyz, Bitarap Türkmenistanyň goranyş häsiýetli Harby doktrinasyna laýyklykda, deňiz serhedimiziň ygtybarlylygyny hem-de eldegrilmesizligini üpjün etmek hemişe üns merkezinde durýar. 10-njy awgustda Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy Serdar Berdimuhamedow günbatar sebitimizde ýerleşýän Harby-Deňiz Güýçleriniň «Garşy» deňiz birikmesinde «Deňiz han» atly korwet kysymly harby gämi bilen tanyşdy.
«Deňiz han» atly korwet kysymly harby gämi gurluşynyň aýratynlygy bilen söweşjeň mümkinçiliklerine eýedir. Hormatly Prezidentimiz bu häzirki zaman gämisiniň tehniki häsiýetnamalary, bölümleriniň işleýiş usullary bilen tanyşdy. Bu gämi garşydaşyň suwasty hem-de suwüsti söweşjeň gämilerini, guryýer we howa nyşanlaryny ýekelikde, gämi ugry toparynyň düzüminde ýok etmek üçin niýetlenendir. Şol bir wagtda ol garşydaşyň gämi toparyny, desant otrýadlaryny ýok etmek, öz güýçlerimizi penalamak, toplumlaýyn aňtaw işlerini alyp barmak suwüsti we suwasty giňişlige gözegçilik etmek wezipelerini ýerine ýetirýär.