12-nji dekabrda Halkara Bitaraplyk güni mynasybetli Diýarymyzyň ähli künjeginde guralan dabaraly baýramçylyk çäreleri giň gerime eýe boldy. Şöhratly pederlerimiziň hoşniýetlilik, ynsanperwerlik, parahatçylyksöýüjilik ýörelgelerine esaslanyp gazanylan Bitaraplygymyzyň indi birnäçe ýyldan bäri halkara derejesinde baýram edilmegi guwandyryjy ýagdaýdyr. Çünki dünýä bileleşigi tarapyndan ykrar edilen ýurdumyzyň bu beýik derejesi giň halkara hyzmatdaşlygynyň ösdürilmegini, tutuş adamzadyň bähbidine gönükdirilen asylly başlangyçlaryň amala aşyrylmagyny, Türkmenistanyň daşary syýasat işiniň üstünliklere beslenmegini şertlendirýär. Hemişelik Bitaraplygymyzyň 26 ýyllyk senesini giňden dabaralandyrmak maksady bilen ýaýbaňlandyrylan baýramçylyk çäreleri Watanymyzyň abadançylygynyň, gülläp ösüşiniň, raýatlarymyzyň bagtyýar we abadan durmuşynyň aňlatmasyna öwrüldi.
Senenamamyzda aýratyn orun alan bu milli baýramymyz gadymy Lebap ilinde-de aýratyn buýsanç, uly ruhubelentlik bilen garşylanyldy. Şol gün baýramçylyk dabaralary ir säherden Türkmenabat şäherindäki Baş Baýdak meýdançasyndan başlandy. Bu ýerde Halkara Bitaraplyk güni mynasybetli Döwlet baýdagymyzyň belende galdyrylyş dabarasy boldy. Oňa welaýat we Türkmenabat şäher häkimlikleriniň ýolbaşçylary, Türkmenistanyň Milli Geňeşiniň Mejlisiniň deputatlary, il sylagly ýaşulularymyz, jemgyýetçilik guramalarynyň wekilleri, bilim, medeniýet, saglygy goraýyş ulgamlarynyň işgärleri gatnaşdylar. Döwlet senamyzyň dabaraly ýaňlanmagy bilen belende galdyrylan ýaşyl Baýdagymyz Garaşsyz, baky Bitarap Diýarymyzyň özygtyýarlylygynyň, mizemez berkararlygymyzyň, il agzybirliginiň, ýurt abadançylygynyň nyşany bolup parlady. Baýramçylyk dabarasy ösüşiň döredijilik ýoly bilen öňe barýan eziz Diýarymyzyň daşary we içeri syýasatynda gazanylan üstünlikler, belent sepgitler baradaky ildeşlerimiziň çykyşlary bilen dowam etdi. Çykyşlarda dünýäde dost-doganlyk gatnaşyklaryny berkitmekde we parahatçylygy pugtalandyrmakda türkmen Bitaraplygynyň ähmiýeti dogrusynda aýratyn nygtaldy.
