Sülgünleriň dünýäde 125 görnüşi bolup, ýurdumyzda olaryň dört görnüşi duşýar. Daşky sypatyndan ýabany sülgün öý towugyny ýatladýanam bolsa, olardan sähel kiçiräk, guýrugy bolsa inçeden uzyndyr. Horazynyň sarydan gyzylymtyl-goňur reňki, inçeden uzyn guýrugy, çalymtyl, altynsow hem-de mawymtyl reňkli peri ýalpyldap, oňa owadan görk berýär. Agramy 2 kilograma çenli ýetýär. Sülgüniň mäkiýany kiçiräk we çalymtyl-çägesöw reňkde bolýar. Ownuk jandarlar we mör-möjekler, şeýle-de ösümlikleriň dürli bölekleri, tomzaklar, möýler, gurçuklar bilen iýmitlenýär.
Sülgün örän köpelgiçdir. Ol her gezekde 7-18, köplenç, 8-14 ýumurtgany basyp çykarýar. Jüýjeler peri biraz gatansoň, özbaşdak hereket edip we iýmitlenip başlaýarlar. 50 günden soň bolsa uçmagy başarýarlar. 4-5 aýlyk bolanlaryndan soň, olaryň göwresi uly guşlaryň derejesine ýetýär. Olar güýzüne süri bolup ýaşaýarlar.
