Gökdepe etrabynyň Kärizek geňeşliginiň Aba Annaýew obasy we onuň bilen ýanaşykda ýerleşýän Halkara ahalteke atçylyk sport toplumy Köpetdagyň etegine özboluşly gözellik goşýar. Bir-biri bilen özboluşly sazlaşygy emele getirip, göreni haýrana goýýan bu nusgalyk oba we toplum Gahryman Arkadagymyzyň gatnaşmagynda 2016-njy ýylyň 22-nji aprelinde dabaraly ýagdaýda açylyp, ulanylmaga berildi.
Ussat atşynas, tejribeli seýis Aba Annaýewiň adyny uly buýsanç bilen göterýän bu nusgalyk obada ýaşaýan atçylyk hünärmenleri, seýisler özleri üçin döredilen ajaýyp mümkinçiliklerden ruhlanyp, geçen ýyllaryň içinde behişdi bedewleri ösdürip ýetişdirmek we sporta taýýarlamak babatda guwandyryjy işleri alyp bardylar hem-de bu ugurdaky işleri häzirki günlerde-de üstünlikli dowam edýärler. Munuň şeýledigine Türkmenistanyň Kärdeşler arkalaşyklarynyň welaýat birleşmesiniň başlangyjy esasynda Aba Annaýew obasynda we onuň bilen ýanaşykda ýerleşýän Halkara ahalteke atçylyk sport toplumynda döredijilik saparynda bolanymyzda hem aýdyň göz ýetirdik.