Türgenlerimiziň Kazandaky üstünlikleri
Ýakynda Russiýa Federasiýasynyň Tatarystan Respublikasynyň Kazan şäherinde guşakly göreş boýunça ulularyň arasynda dünýä çempionatynda we 20 ýaşa çenli ýaşlaryň arasynda geçirilen birinjilikde ýurdumyzyň ýygyndy toparynyň agzalary üstünlikli çykyş etdiler. Ulularyň arasynda geçirilen dünýä çempionatyna dünýäniň 34 döwletinden 250-den gowrak türgen gatnaşdy. Ulularyň arasynda geçirilen çempionatda ýurdumyzyň türgenleri 3 altyn, 1 kümüş we 5 bürünç, jemi 9 medal gazandylar. 18 — 20 ýaşly türgenleriň arasyndaky dünýä birinjiliginde bolsa türgenlerimiz 3 altyn, 1 bürünç medala mynasyp boldular. Altyn medallaryň ählisi göreşiň erkin usuly görnüşinden gazanyldy. Ulularyň arasynda 62 kilogram we 100 kilogram agram derejelerinde çykyş eden, Türkmenistanyň Goranmak ministrliginiň çagyryş boýunça harby gullukçylary Abdyresul Durdyýew bilen Pälwan Gurbangeldiýew hem-de 90 kilogramda ýaryşa gatnaşan Türkmen döwlet maliýe institutynyň 3-nji ýyl talyby Annagurban Allaberdiýew dünýä çempionatynyň altyn medallarynyň eýeleri boldular. A.Allaberdiýewiň ýaşlaryň arasynda geçirilen birinjilikde hem altyn medal gazanandygyny bellemelidiris.
