Berkarar döwletiň täze eýýamynyň Galkynyşy döwri uly özgerişlere, ösüşlere beslenýär we hormatly Prezidentimiziň alyp barýan daşary syýasaty barha giň gerime eýe bolýar. Dünýä döwletleri bilen parahatçylyga, halklaryň abadançylygyna we ählumumy ösüşe ýardam edýän oňyn we netijeli işler amala aşyrylýar. Şunda Türkmenistanyň goňşy döwletler bilen hyzmatdaşlygyna aýratyn ähmiýet berilýär.
Türkmenistan oňyn Bitaraplyk, parahatçylyk söýüjilik, hoşniýetli goňşuçylyk we özara bähbitli hyzmatdaşlyk ýörelgelerine esaslanýan daşary syýasy ugry durmuşa geçirmek bilen, parlament diplomatiýasynyň gurallaryndan netijeli peýdalanmaga uly ähmiýet berýär. Parlament diplomatiýasy bolsa döwletara, sebit we ählumumy derejede örän wajypdyr. Ýakynda Gahryman Arkadagymyzyň Russiýa döwletine amala aşyran sapary aýratyn many-mazmuna eýedir. Duşuşykda Türkmenistanyň Milli Geňeşiniň Halk Maslahatynyň we Russiýa Federasiýasynyň Federal Ýygnagynyň Federasiýa Geňeşiniň parlamentara toparyny döretmek hakynda Ylalaşyga gol çekilmegi, Aşgabatda Türkmen-rus uniwersitetini döretmek baradaky başlangyç hakynda aýdylyp, geljek ýylda bu ýokary okuw mekdebiniň binýadynyň tutulyp bilinjekdigi barada ara alnyp maslahatlaşylmagy has-da guwandyryjydyr. Russiýa Federasiýasynyň Prezidentiniň Gahryman Arkadagymyzy IV derejeli «Watanyň öňünde bitiren hyzmatlary üçin» ordeni bilen sylaglamak hakyndaky çözgüdi onuň döwletara hyzmatdaşlygy ösdürmäge goşan ägirt uly goşandynyň ykrarnamasydyr.
