Sungatyň ýyldyzlary Watanyň asuda gijelerinde asmany däl-de, şowhunly toýlarynda sahnalary bezeýärler. Her Täze ýyl baýramçylygynyň öňüsyrasynda şeýle ýyldyzlaryň has parlagy «Ýylyň parlak ýyldyzy» bäsleşiginiň ýeňijisi bolýar. «Pähim-paýhas ummany Magtymguly Pyragy» ýylynyň 16-njy dekabrynda Türkmenistanyň Alp Arslan adyndaky milli drama teatrynda Türkmenistanyň Medeniýet ministrliginiň, Telewideniýe, radiogepleşikler we kinematografiýa baradaky döwlet komitetiniň hem-de Magtymguly adyndaky Ýaşlar guramasynyň Merkezi geňeşiniň bilelikde guramagynda ýurdumyzyň ýaş estrada aýdymçylarynyň arasynda bu bäsleşigiň jemleýji tapgyry geçirildi. Oňa saýlama aýdymçylaryň onusy gatnaşdy. Olaryň içinden yhlasy, tejribesi, ýakymly owazy bilen «Ýylyň parlak ýyldyzy» diýen ada we göçme kuboga meşhur aýdymçy Gylyçdurdy Durdyýew mynasyp boldy. Bizem Gylyçdurdy Durdyýewi bu üstünligi bilen gutlap, oňa söz berýäris.
— Gök asmanynda Tugy parlaýan ýurdy, depesinden nurly Güni parlap dogýan halky, elinde lowurdap duran «Ýylyň parlak ýyldyzy» atly bäsleşigiň göçme kubogy bolan aýdymçy neneň bagtly bolmasyn! Ýyldyz bolmak birwagtlar çagalyk arzuwymdy. Tebigatyň owazyny, heňini diňläp ulaldym. Bu üstünligime radioda, telewizorda ýa toýlarda aýdym aýdýan ýyldyzlaryň birine öwrülmek arzuwymyň wysaly diýip düşünýärin. Şeýle arzuw meni bu jadyly sungata alyp geldi. Ynha, bu günki gün maňa «Ýylyň parlak ýyldyzy — 2024» bäsleşiginiň ýeňijisi diýen adyň, şeýle-de göçme kubogyň, bäsleşige gatnaşyjylar bilen bir hatarda hormatly Prezidentimiziň Şa serpaýyna — Türkmenistanyň «Magtymguly Pyragynyň 300 ýyllygyna» atly ýadygärlik nyşanynyň eýesi bolmak bagty miýesser etdi. Bäsleşikde Türkmenistanyň at gazanan artisti, kompozitor Çary Hekimowyň sazyna Türkmenistanyň at gazanan artisti Nurýagdy Tokgaýewiň «Senmidiň?» aýdymyny hem-de Magtymguly Pyragynyň sözlerine Türkmenistanyň at gazanan artisti Gurban Gummanowyň aýdan «Bu derdi» aýdymyny sazsyz ýerine ýetirdim. Halypalaryň döredijiliginden ylham, baş halypamyz Gahryman Arkadagymyzdan nusga alyp, geljekde-de göwünleri gülletjek gözel aýdymlary halkymyza ýetirerin. Aýdym-saz sungatymyzy belent derejelere çykarýan Gahryman Arkadagymyza, Arkadagly Gahryman Serdarymyza tüýs ýürekden sagbolsun aýdýaryn, janlarynyň sag, ömürleriniň uzak bolmagyny, döwletli tutumlarynyň rowaç almagyny arzuw edýärin.
