Bahar KAKABAÝEWA
Döwlet arassaçylyk we keselleriň ýaýramagyna garşy göreşmek gullugynyň Jemgyýetçilik saglygy we iýmit merkezi
Mikroblara garşy dermanlara durnuklylygyň giňden ýaýramagy milli, sebitleýin we global derejelerde gaýragoýulmasyz çäreleriň geçirilmegini talap edýän göwrümi eýeledi. Şeýlelikde, mikroblara garşy derman serişdelerine durnuklylyk jemgyýetçilik saglygy goraýşyň düýpli halkara meseleleriniň biri bolmagynda galýar [1]. Mikroblaryň durnuklylygynyň epidemiologik gözegçiligini geçirmegiň maksady, ýokanjy has netijeli bejermegiň usullaryny işläp düzmekden we lukmançylyk amalyýetine girizmek üçin zerur bolan maglumatlary almakdan, ýerli, sebitleýin, milli we halkara derejesinde mikrob rezistentliginiň we onuň bilen baglylykda ýüze çykýan keselleriň öňini almakdan ybaratdyr.
