Halkymyz akyl-paýhas bilen bitirilen işleri görmegi, ol hakda eşitmegi, oňa şaýat bolmagy gowulyga ýorýar. Ony ömrüň many-mazmuny hasaplaýar. Dünýädäki, ata Watanyňdaky ösüş-özgerişler hakynda gowy adamlar bilen söhbetdeş bolmak ruhuňy beýgeldýär, ýaşyňy uzaldýar.
Geliň, gowusy, başdan başlalyň! Baharyň soňky günleri — tomsuň ilkinji günleri iş sapary bilen Ahal welaýatynda bolmak nesip etdi. Kärdeşimiz bilen iş meýilnamamyzy düzenimizde, welaýatyň iki-üç etrabynda bolarys diýen niýetimiz bardy. Emma Gahryman Arkadagymyzyň, Arkadagly Serdarymyzyň pähim-parasadyndan gülleýän ata Watanymyzyň welaýatlarydyr etraplaryndaky özgerişlikleriň giň gerimliligi iş saparymyzy diňe Bäherden etrabynda geçirmeli etdi.
