Milli binagärligiň beýik nusgasy hökmünde dünýäde tanalýan, ajaýyp keşbi bilen göreni haýrana goýýan gözel paýtagtymyz Aşgabady başgaça atlandyrmak mümkin däl. Garaşsyz Watanymyzyň ýüregi, berkarar döwletimiziň ýüzi hasaplanýan paýtagtymyzyň keşbinde ýurdumyzyň ösen ykdysadyýeti, senagaty, medeni we ruhy galkynyşlary jemlenýär. Onda halkymyzyň bagtyýar durmuşyny, aýdyň geljegini görmek bolýar. Aşgabat diňe gözelligiň däl, eýsem, iň bagtly adamlaryň şäheri. Ol Gahryman Arkadagymyzyň yhlas-aladasyndan kemala gelip, Berkarar döwletiň täze eýýamynyň Galkynyşy döwründe Arkadagly Gahryman Serdarymyz tarapyndan sungat derejesinde ösdürilýär.
Hormatly Prezidentimiziň, Gahryman Arkadagymyzyň taýsyz tagallalary bilen mermer paýtagtyň şähergurluşyk-binagärlik keşbi barha gözelleşýär. Milliligiň belent ruhy siňdirilen binalara özboluşly bezeg bolan giň gerimli dizaýnerçilik çözgütleri ornaşdyrylýar. Ildeşlerimiziň döwrebap ýaşaýşyny üpjün edýän ýaşaýyş jaý toplumlary, medeni-durmuş, bilim we saglyk maksatly desgalar, söwda we medeni dynç alyş merkezleri, seýilgähler, şaýollary, köprüler yzygiderli gurlup, halkymyzyň hyzmatyna berilýär. Ak şäheriň we ondaky owadan desgalaryň onlarçasynyň Ginnesiň rekordlar kitabyndan orun almagyny, «Dizaýn» ugry boýunça ÝUNESKO-nyň döredijilik toruna girizilmegini beýik Garaşsyzlygymyzyň ajaýyp miwesi hökmünde agzamak bolar. Türkmen halkynyň Milli Lideri gözel paýtagtymyzda ýaýbaňlandyrylýan giň möçberli işler bilen yzygiderli gyzyklanýar, onuň gurluşyk-binagärlik keşbiniň aýratynlyklaryny hemişe üns merkezinde saklaýar. Gahryman Arkadagymyzyň golaýda «Rönesans Holding» türk kompaniýasynyň müdiriýetiniň başlygy bilen duşuşyp, häzirki wagtda kompaniýa ynanylan taslamalary durmuşa geçirmegiň barşy barada gyzyklanmagy bu hakykatyň aýdyň beýanydyr. Duşuşykda Gahryman Arkadagymyza Aşgabatda täze, häzirki zaman söwda merkeziniň binalar toplumyny gurmak babatda kompaniýa tarapyndan işlenip taýýarlanylan taslamalar görkezildi. Hormatly Prezidentimiziň gol çeken taryhy Kararyna laýyklykda, döwrebap söwda merkezi paýtagtymyzyň A.Nyýazow şaýolunyň ugrunda bina ediler. Munuň özi milli binagärligiň täsin nusgalarynda gurlup, halkymyza ýokary derejede hyzmat edip gelýän «Aşgabat», «Berkarar», «Aşgabadyň ýalkymy», «Bagtyýarlyk», «Gülzemin», «Arkaç» söwda we dynç alyş merkezleriniň üstüni ýetirer.
