Golaýda A.A.Gromyko adyndaky Daşary syýasaty öwreniş birleşiginiň, Belarussiýanyň Prezidentiniň ýanyndaky Dolandyryş akademiýasynyň, Russiýa Federasiýasynyň Ylymlar akademiýasynyň Ýewropa institutynyň hem-de Russiýa Federasiýasynyň Daşary işler ministrliginiň Moskwa döwlet Halkara gatnaşyklary institutynyň guramagynda geçirilýän GDA-nyň ýaş halkaraçylarynyň A.A.Gromyko adyndaky bäsleşiginiň jemleri jemlendi.
Bu ýyl bäsleşige GDA agza ýurtlaryň 330-a golaý ýokary okuw mekdebinden 2181 sany ýaş hünärmendir halkaraçy talyp gatnaşdy. Olar «Beýik Watançylyk urşunyň taryhy meseleleri we taryhyň galplaşdyrylmagyna garşy göreş», «BMG-niň häzirki zaman dünýäsindäki orny», «Ýewraziýa giňişliginde integrasiýa prosesleri we diplomatiýa», «Ýewropa Bileleşigi we GDA-nyň daşary syýasaty» ýaly temalarda ýazan ylmy işlerini ugratdylar.
