Öňümizde duran jogapkärli möwsüm — pagta ýygymyna ýurdumyzyň ähli welaýatlarynda bolşy ýaly, Mary welaýatynda hem ykjam taýýarlyk görülýär. Welaýat oba hojalyk önümçilik birleşiginiň tehnikalara tehniki taýdan hyzmat edýän kärhanalarynda pagta ýygýan kombaýnlary we gaýry tehniki serişdeleri birlaý gözden geçirip, taýýarlyk hataryna çykarsalar, Türkmenistanyň Oba hojalyk ministrliginiň «Marypagta» önümçilik birleşiginiň işgärleri-de pagta hasylyny gaýtadan işlejek zawodlary we hasyly kabul edýän harmanhanalary möwsüme taýýarlamakda tutumly işleri durmuşa geçirýärler. Önümçilik birleşiginiň welaýatdaky 9 sany pagta arassalaýjy kärhanasynda çig maly işleýän tehnikalaryň we tehnologiýalaryň, enjamlaryň ählisi doly gözden geçirilip, möwsüme taýýarlanylýar.
Welaýatyň çägindäki pagta hasylyny kabul etjek harmanhanalaryň 35-sinde taýýarlyk işleri gyzgalaňly dowam edýär. Şol ýerdäki gowaça hasylyny harmanlara çykarýan tehniki serişdeler ilik-düwme gözden geçirilýär. Barlaghana bölümindäki ähli serişdeler we hasylyň agramyny çekjek ýük terezileri ykjam barlanylýar. Harmanlary örtmäge niýetlenilen örtgülerdir gaýry serişdeler hem taýýarlanylýar. Ýangyn howpsuzlyk düzgünleri berk berjaý edilýär.
