Gahryman Arkadagymyzyň başlangyjy we Arkadagly Serdarymyzyň mynasyp dowam etdirmegi bilen, Berkarar döwletiň täze eýýamynyň Galkynyşy döwri ýurdumyzyň ösüşlerine bedew badyny berýär. Syýasatda, ykdysadyýetde, bilimdir saglygy goraýyşda, medeniýetdir sportda asyrlara barabar ösüşler amal edilýär.
Ýurdumyzda ahalteke bedewleriniň ugurbaşy tohumlaryny seýisläp ýetişdiren meşhur seýisleriň tagallasy bilen, bedewlerimiziň gözellik keşbi, ýyndamlygy, syzgyrlygy, duýgurlygy, eýesine wepalylyk häsiýeti saklanylyp, ösdürilip gelindi. Gahryman Arkadagymyzyň tagallasy bilen, 2010-njy ýylda ştab-kwartirasy paýtagtymyz Aşgabatda ýerleşýän Halkara ahalteke atçylyk assosiasiýasy döredildi. Assosiasiýa özüne dünýä ýurtlarynda ahalteke atlaryny seýisläp, idedip ýetişdirýän assosiasiýalary, hususy taraplary, atşynaslary birleşdirdi. Şeýlelikde, ahalteke bedewlerini gorap saklamak, olaryň baş sanyny köpeltmek, tohumçylyk-seleksiýa işlerinde özara tejribe alyşmaga mümkinçilik berdi.
