Magtymguly Pyragynyň edebi mirasy durmuşyň islendik ugruna degişli goşgulara, parasatly setirlere, jaýdar jümlelere, nakyla öwrülen sözlere baý. Beýik akyldaryň paýhaslar hazynasy dürli ugurlar bilen bir hatarda, «bijanlara jan berýän» ýagyş-ýagmyr, akar suw, ekin-dikin hakda hem gymmaty egsilmejek hikmetli setirleriň gorudyr.
«Kadyr Alla, dökgün rahmet-barany», «Akarda suw ýa öserde ýel bolgul», «Ýagmyr bilen ýer gögär», «Asmandan nur ýagsa, minewwer bolar» diýip, suwy, ýagyş-ýagmyry adamzat ähliniň baş zerurlygynyň biri, eklenjiniň medetkäri hasaplan ussadyň şu setirleri halk durmuşynda nakyla öwrülipdir.