Gowaça ekiljek meýdanlarda irki möhletlerde şüdügär sürüminiň geçirilmegini gazanmak örän möhüm daýhançylyk çäreleriniň biridir. Şundan ugur alýan Bäherden etrabynyň ekerançylary bu işe irki möhletde girişdiler. Etrabyň pagtaçy kärendeçileri «Halkyň Arkadagly zamanasy» ýylynda meýilnama boýunça 12 müň gektar meýdana gowaça ekmegi meýilleşdirip, meýdan işleriniň gerimini has-da ýaýbaňlandyrýarlar.
Ekin meýdanynda ençeme günlerden bäri alnyp barylýan şüdügär sürüminiň gerimi gün-günden giňeýär. Etrabyň tehniki taýdan hyzmat ediş kärhanasynyň sürümçileriniň toparlaýyn usulda zähmet çekmekleri iş wagtyndan örän netijeli peýdalanmagyna oňyn täsirini ýetirýär. Mehanizatorlaryň arasynda özara zähmet bäsleşiginiň dowam etdirilmegi-de, işleriň ilerlemegine ýardam berýär. Sürüm işiniň hil derejesine ýörite hünärmenler tarapyndan gözegçilik edilýär. Bu möhüm ekerançylyk çäresini geçirmekde etrabyň Magtymguly, Şaja Batyrow adyndaky, «Zähmet» daýhan birleşiklerinde zähmet çekýän mehanizatorlar öň hatarda barýarlar.
