«Fermer» diýlende, wagtynyň köp bölegini maldarçylyk toplumynda ýa-da ekin meýdanlarynda geçirip, amatsyz howa şertlerine garamazdan, ýerden bol hasyl almagyň aladasy bilen ýaşaýan adaty daýhan göz öňüňize gelýändir. Ýöne bu häzirki döwürde edil beýle-de däl. Oba hojalygyna ylmy-tehnologiýanyň täze gazananlarynyň ornaşdyrylmagy bilen, işewürlik hem-de telekeçilik ulgamynda daýhan hojalyklarynyň döwrebap ösmegine hem oňyn şertler döredildi. Şolaryň arasynda oba hojalyk işlerinden iň köp girdeji gazanýan hytaýly fermer Lýu Ýunsin hasaplanylýar. Ol öz doganlary bilen 1982-nji ýylda bedeneleri ösdürip ýetişdirmek boýunça «Hope Group» atly kiçijik fermany döredip, 1986-njy ýylda maldarçylykda ulanylýan ot-iýmlere gözegçilik merkezini esaslandyrýar.
Geçen asyryň togsanynjy ýyllarynda Lýu Ýunsin we onuň doganlary özbaşdak kompaniýalara eýe bolýarlar. Lýu Ýunsin oba hojalyk pudagyndaky işlerini dowam etdirip, maldarlar üçin ot-iýmleri taýýarlamak, dürli görnüşli maldarçylyk önümlerini öndürmek bilen meşgullanýar. Şeýlelikde, ol dünýäde agrosenagat ulgamynda iň köp girdeji gazanýan we hasabynda 6,6 milliard dollary bolan fermerleriň biri hasaplanylýar.