Beýik özgertmeleriň, köpugurly üstünlikleriň, şanly wakalaryň senesi hökmünde Berkarar döwletimiziň bagtyýarlyk döwrüniň täze taryhyna altyn harplar bilen ýazylýan «Türkmenistan — parahatçylygyň we ynanyşmagyň Watany» ýyly hem ahyrlap barýar. Bu rowaç ýylda ýurdumyzyň, baş şäherimiz Aşgabadyň durmuşynda möhüm ähmiýetli wakalaryň ençemesi bolup geçdi. Şolaryň hatarynda Aşgabat şäheriniň esaslandyrylmagynyň 140 ýyllygyny hem-de mukaddes Garaşsyzlygymyzyň 30 ýyllyk ýubileýini, şeýle hem ýaňy-ýakynda uly joşgun bilen baýram edilen hemişelik Bitaraplygymyzyň 26 ýyllyk baýramyny görkezmek bolar. Ýylyň dowamynda yzygiderli gurlup ulanylmaga berlen binalar paýtagtymyzyň şähergurluşyk-binagärlik keşbiniň has-da baýlaşmagynda möhüm ähmiýete eýe boldy. Şol desgalar halkymyzyň bagtyýar zamanamyzda asuda we eşretli durmuşda ýaşaýandygynyň aýdyň görkezijisi bolup durýar.
Her bir şanly senede, uludan tutulýan toý-baýramlarymyzda ýurdumyzyň baş şäheriniň baýramçylyk lybasyna beslenýändigi aýratyn buýsandyryjydyr. Hemişelik Bitaraplygymyzyň 26 ýyllyk baýramynyň bellenilen günlerinde paýtagtymyzyň ähli ýerlerini «Baýramyňyz gutly bolsun!», «Bitarap Türkmenistana 26 ýyl» ýaly ýazgylar bezedi.
