Eziz Diýarymyzda hormatly Prezidentimiziň parasatly baştutanlygynda durmuşa geçirilýän halk bähbitli işleriň, ýetilýän belent sepgitleriň ählisi halkymyzyň bähbidine, ýurdumyzyň gülläp ösmegine gönükdirilendir. Durmuşa geçirilýän aýdyň maksatly işleriň binýadynda ýurdumyzyň bilim ulgamyny döwrebaplaşdyrmak üstünlikli amala aşyrylýar. Diýarymyzyň ýokary okuw mekdeplerinde täze hünär ugurlarynyň açylmagy, bilim işine sanly ulgamyň ornaşdyrylmagy netijesinde ynsanperwer we takyk ugurlar boýunça ýokary bilimli hünärmenleri ýetişdirmek wezipesini çözmek meseleleri netijeli häsiýete eýe bolýar. «Türkmenistanda sanly bilim ulgamyny ösdürmegiň Konsepsiýasyna», «Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasyna», «Elektron resminama hakynda», «Aragatnaşyk hakynda», «Türkmenistanda Internet torunyň ösüşi we Internet-hyzmatlaryny etmegi hukuk taýdan düzgünleşdirmek hakynda», «Maglumat we ony goramak hakynda» Kanunlara we beýleki kadalaşdyryjy hukuk namalaryna laýyklykda, ýokary okuw mekdeplerinde sanlylaşdyrylan ulgam esasynda geçilýän sapaklar mazmuna baýlygy we gyzyklydygy bilen ýaşlary özüne çekýär.
Ata Watanymyzda milli ykdysadyýetiň we dolandyryşyň sanly ulgamyna geçmek boýunça wajyp wezipeler Gahryman Arkadagymyz tarapyndan has-da aýdyňlaşdyrylyp, barha üstünliklere eýe bolýar. Ýurdumyzy sanly ykdysadyýete geçirmegiň maksatnamasyna laýyklykda, «Türkmenistan — parahatçylygyň we ynanyşmagyň Watany» ýylynda maksatnamany amala aşyrmakda iňňän möhüm ähmiýetli işler durmuşa ornaşdyryldy. Hemmämize mälim bolşy ýaly, ykdysadyýet, tehnika, dolandyryş ulgamlary, umumy durmuş bilimi barha giň gerime eýe bolýar. Şeýlelikde, gysga möhletiň dowamynda sanly ykdysadyýete geçmegimiz ýurdumyzyň dünýä giňişliginde öz mynasyp ornuny tapmagyny, halkymyzyň durmuş derejesiniň has-da ýokarlanmagyny, uzak geljegimizi nazarlaýan howpsuz we ygtybarly ösüşimizi kepillendirýär.
