Berkarar döwletimiziň bagtyýarlyk döwründe hormatly Prezidentimiziň aladalary netijesinde, ýurdumyzyň elektroenergetika pudagy sanlyja ýyllaryň içinde uly ösüşlerdir üstünliklere eýe boldy. Eziz Watanymyzyň elektroenergetika pudagy täze taryhy döwri başdan geçirýär. Ylmy tehnologiýanyň häzirki ösýän döwründe adamzadyň ýaşaýyş durmuşy elektrik energiýasy bilen berk baglanyşykly bolup, onsuz durmuşy göz öňüne getirmek hem örän kyn. Dünýäde energiýa serişdelerine bolan islegiň has çalt depginler bilen artýan häzirki döwründe Gahryman Arkadagymyzyň görkezmelerinden ugur alnyp ýurdumyzda gysga döwrüň içinde iri energodesgalaryň birnäçesi gurlup ulanylyşa girizildi. Ýurdumyzyň elektroenergetika pudagyny ösdürmegiň kabul edilen konsepsiýasyna laýyklykda, Watanymyzyň dürli künjeklerinde döwrebap gazturbinaly elektrik stansiýalary, paýlaýjy gurluşlary, elektrik geçirijileri yzygiderli gurlup ulanylmaga berildi. Birnäçe ýyllardan bäri işläp gelýän energodesgalaryň bolsa durky täzelenýär, olar häzirki döwrüň ösen talaplaryna doly gabat gelýän döwrebap elektrik gurnamalar bilen üpjün edilýär. Taryh üçin şeýle gysga döwürde gurlan energo desgalaryň içinde Ahal welaýatynyň çägindäki kuwwaty 504,4 MWt bolan Derweze döwlet elektrik stansiýasyny, Lebap welaýatynda 254 MWt kuwwatly Watan döwlet elektrik stansiýasyny, sebitde ilkinji gurlan utgaşykly dolanyşykda işleýän gaz turbinaly Mary döwlet elektrik stansiýasyny, şeýle-de mukaddes Garaşsyzlygymyzyň 30 ýyllygynyň öň ýanynda gurlup ulanylmaga berlen, kuwwaty 432 MWt deň bolan Lebap döwlet elektrik stansiýasyny bellemek zerurdyr. Mundan başga-da, Mary döwlet elektrik stansiýasynyň 220 we 500 kW ýokary woltly açyk paýlaýjy gurluşlary has döwrebap görnüşde işe girizildi. Häzirki wagtda has ygtybarly hasaplanýan birikmeler we kämil enjamlar bilen üpjün edilen bu paýlaýjy gurluş bilen Lebap welaýatynyň Kerki etrabynyň çäginde ýerleşýän Kerki 500 kW paýlaýjy gurluşy birikdirýän, uzynlygy 388 km deň bolan Mary DES — Kerki ýokary woltly howa elektrik geçirijisi hem işe girizildi.
Ýurdumyzyň senagat taýdan has kuwwatly döwlete öwrülmegi, halkymyzyň ýaşaýyş durmuş derejesiniň ýokarlanmagy we elektrik energiýasynyň adamzadyň durmuşyna çuň aralaşmagy bilen baglylykda elektrik üpjünçiligi ulgamyna bildirilýän talaplar hem örän ýokarlanýar. Hormatly Prezidentimiziň görkezmelerinden ugur alnyp tutuş ýurdumyz boýunça bir bütewi halkalaýyn energo ulgamyny döretmegiň taslama işleri taýýarlandy we onuň birinji tapgyry durmuşa geçirildi. Sanlyja gün mundan öň, ýagny 23-nji oktýabrda ykdysadyýetimiziň möhüm pudaklarynyň birine öwrülen elektroenergetika pudagynyň taryhyna altyn harplar bilen ýazylan wakalaryň ýene biri, ýurdumyzyň Ahal we Balkan welaýatlaryny birleşdirýän, güýjenmesi 220 kW we uzynlygy 420 km barabar bolan täze iki zynjyrly elektrik geçirijisi işe girizilmegi boldy. Bu iri energo desgany işe girizmek dabarasyna Gahryman Arkadagymyzyň sanly ulgam arkaly ak pata bermegi we gutlag sözlerini aýtmagy energetika pudagynda zähmet çekýän hünärmenleriň we taslamany amala aşyran türkmen gurluşykçylarynyň şatlygyny has-da goşalandyrdy. Geljekde hem taslamanyň Balkan — Daşoguz we Ahal — Mary ugurlarynyň işe girizilmegi elektrik energiýasyny sarp edijileriň elektrik üpjünçiliginiň ygtybarlylygyny we ýurdumyzyň bir bitewi energo ulgamynyň kuwwatynyň birnäçe esse ýokarlamagyna ýardam berer. Mundan başga-da, ýurdumyzyň çäginde hereket etýän elektrik stansiýalaryň ýokary woltly geçiijileriň we döwrebap enjamlaryň üsti arkaly özara baglanyşdyrylmagy netijesinde, elektrik energiýasyny örän az ýitgiler bilen sarp edijilere geçirmeklige hem giň mümkinçilik döredilýär. Bu ýokary woltly halkalaýyn elektrik geçirijileriň işe girizilmegi diňe bir ýurdumyzyň sebitleriniň elektrik energiýasy bilen üpjünçiliginiň ygtybarlylygyny ýokarlandyrman, eýsem, daşary döwletlere hem türkmen elektrik energiýasyny eksport etmegiň mümkinçiliklerini has-da artdyrýar.
