Berkarar döwletimiziň bagtyýarlyk döwründe bank ulgamy döwrebap ösüşlere eýe bolýar. «Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasyna» laýyklykda ýurdumyzda bank ulgamynda sanly ulgama geçiş we bank hyzmatlarynyň işjeňligini ýokarlandyrmak babatynda dünýäniň kämil ulgamlaryndan we gazanylan tejribelerden üstünlikli peýdalanylýar. Sanly özgertmeler bank hyzmatyndan peýdalanmaga isleg bildirýänler üçin döredilýän ýeňillikleri we mümkinçilikleri artdyryp, milli töleg ulgamynyň giň gerimde ornaşdyrylmagy bilen ýurdumyzdaky banklaryň bäsdeşlige ukyplylygyny ýokarlandyrmaga ýardam berýär. Ýurdumyzyň bank ulgamynyň ýokary hilli we işjeň hereket etmegi üçin ornaşdyrylýan döwrebap tejribeler, esasan-da, hyzmat berýänleriň we alýanlaryň arasyndaky gatnaşyklaryň ösdürilmegine, nagt we nagt däl hasaplaşyklaryň ýokary depginde alnyp barylmagyna we pul dolanyşygynyň kämilleşdirilmegine gönükdirilendir. Şunuň bilen baglylykda, hödürlenilýän hyzmatlaryň elýeterliligi karz edaralarynyň we müşderileriň arasyndaky gatnaşyklaryň ýokarlanyp, hyzmatdaşlygyň berkemegi ýokary derejelere çykýar.
Aragatnaşyk ulgamynyň kämil tehnologiýasynyň bank ulgamyna ornaşdyrylmagy bank hyzmatlaryny ösdürmek üçin uzak aralykdan tölegleri amala aşyrmaga giň mümkinçilikleri açýar. Munuň üçin karz edaralary öz müşderilerine döwrebap ykjam telefonlar arkaly tölegleri geçirmäge ýardam berýän goşundylaryny, ýagny programma üpjünçiligini ornaşdyrmak we bularyň durmuşymyza getirýän ýeňillikleri babatynda düşündiriş-mahabat işlerini geçirmek arkaly iş depginlerini ýokarlandyrýar. Internet tehnologiýasynyň we kämil telefonlaryň goşmaça hyzmatlaryndan peýdalanmak bilen, bank amallaryny ýerine ýetirmek isleýänler öz şahsy hasaplaryny barlamak, geçirilen amallary görmek, pul geçirimlerini amala aşyrmak ýaly töleg görnüşleriniň amatly usullaryndan peýdalanýarlar. Ýurdumyzda harytlar we hyzmatlar üçin tölegleri nagt däl görnüşinde, ýagny «Altyn asyr», «Milli kart», «Goýum bank karty» we «Maşgala» bank kartlarynyň üsti bilen amala aşyrmak ýola goýuldy.
