Hormatly Prezidentimiziň parasatly baştutanlygynda Berkarar döwletimiziň bagtyýarlyk döwründe ýurdumyzyň ykdysadyýeti diwersifikasiýalaşdyrylyp, sanly ulgamyň giň mümkinçiliklerini doly peýdalanmaga tarap ynamly ösüşini dowam etdirýär we birnäçe döwlet maksatnamalary kabul edilip, olaryň kanunçylyk binýady barha berkidilýär. Muňa mysal edip, «Türkmenistanyň bank ulgamyny ösdürmegiň 2011-2030-njy ýyllar üçin Döwlet Maksatnamasyny», Türkmenistanyň Prezidentiniň «Ýurdumyzy 2019-2025-nji ýyllarda durmuş-ykdysady taýdan ösdürmegiň Maksatnamasyny» we «Türkmenistanda 2019-2025-nji ýyllarda sanly ykdysadyýeti ösdürmegiň Konsepsiýasyny» görkezmek bolar. Häzirki wagtda bütin dünýäde bolşy ýaly, ýurdumyzda hem milli ykdysadyýetimiziň ähli ugurlaryny sanlylaşdyrmak, hyzmatlary döwrebap talaplara laýyklykda ýola goýmak boýunça ägirt uly işler alnyp barylýar. Ýurdumyzyň ykdysadyýetiniň güýçli depginde ösmeginde bank ulgamynyň orny aýratyn bellenilmäge mynasypdyr.
Bank ulgamy milli ykdysadyýeti maýa goýum serişdeleri bilen üpjün etmekde uly ähmiýete eýe bolup, bu ulgamyň sanlylaşdyrylmagy işewürlik mümkinçiliklerini artdyrmaga, bank hyzmatlarynyň hilini ýokarlandyrmaga, nagt däl hasaplaşyklar ulgamyny ösdürmäge, hyzmatlaryň täze döwrebap görnüşlerini hödürlemäge, harajatlary we wagty tygşytlamaga ýardam berýär. Häzirki wagtda Türkmenistanyň karz edaralarynda nagt däl hasaplaşyklary has-da ösdürmek, pul dolanyşygynyň netijeliligini ýokarlandyrmak, hödürlenilýän hyzmatlary onlaýn görnüşinde amala aşyrmak bilen bank kartlary arkaly töleg ulgamynyň ýaýrawy giňeldilýär. Hususan-da, nagt däl hasaplaşyklary ösdürmegiň çäklerinde ýurdumyzyň karz edaralary bank kartlarynyň täze görnüşlerini ilata hödürleýärler. Muňa mysal edip, «Goýum bank karty», «Maşgala» we «Owerdraft» bank karz kartyny görkezmek bolar.