Berkarar döwletimiziň bagtyýarlyk döwründe hormatly Prezidentimiziň parasatly baştutanlygynda ýurdumyzyň ähli ykdysady pudaklary bilen bir hatarda bank ulgamynda hem giň gerimli özgertmeler yzygiderli amala aşyrylýar. Bank ulgamynda sanly tehnologiýalary işjeň ulanmak, elektron resminama dolanyşyk ulgamyny kämilleşdirmek, maglumat howpsuzlygyny üpjün etmek we beýleki ugurlar boýunça zerur enjamlary, programma üpjünçiliklerini ornaşdyrmak işleri amala aşyrylýar.
«Türkmenistanda 2019-2025-nji ýyllarda sanly ykdysadyýeti ösdürmegiň Konsepsiýasyna» laýyklykda, ýurdumyzda sanly ykdysadyýeti ösdürmek bilen bagly işler maksatnamalaýyn esasda alnyp barylýar. Ilatyň bank ulgamyna bolan ynamyny artdyrmak, karz alyjylaryň we goýumçylaryň bähbitlerini goramak maksady bilen, banklaryň kadalaşdyryjy hukuk binýady yzygiderli kämilleşdirilýär. Ygtybarly we döwrebap hasaplaşyk ulgamlarynyň hereketini üpjün etmek, şeýle hem pul serişdeleriniň ýerleşdirilişini kadalaşdyrmak arkaly maliýe bazaryny kämilleşdirmek Türkmenistanyň pul-karz syýasatynyň netijeliligini artdyrmagyň möhüm şerti bolup çykyş edýär.