Milli ykdysadyýetimiziň ähli pudaklary bilen bir hatarda, bilim edaralaryny sanlylaşdyrmak döwlet syýasatynda ileri tutulýan ugurlaryň biri hasaplanýar. Hormatly Prezidentimiziň parasatly baştutanlygynda kabul edilen «Türkmenistanda sanly bilim ulgamyny ösdürmegiň Konsepsiýasy» hem-de «Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasy» ýurdumyzda sanly ulgama geçilmegiň baş ýörelgeleri bolup durýar. Şuňa esaslanyp, bilim-terbiýeçilik edaralarynda sanly ulgama geçmek boýunça durmuşa geçirilen hem-de häzirki wagtda alnyp barylýan giň gerimli işler sanardan kändir. Sanly ulgam hakynda söz açylanda, ýurdumyzyň ýokary okuw mekdepleriniň resmi web-saýtlary barada gürrüň etmek ýakymlydyr.
Häzirki wagtda döwletimiziň degişli ýokary okuw mekdepleriniň resmi web-saýtlary döredilip, olar işjeň ýagdaýda hereket edýärler. Ýokary okuw mekdepleriniň her biriniň ýöriteleşen saýtlaryň ugruna, maksadyna we wezipelerine laýyklykda, özboluşly dizaýn bezegi bar. Bellemeli zatlaryň biri-de, şol saýtlarda, ilkinji nobatda, degişli ýokary okuw mekdebiň, onda hereket edýän fakultetleriň, kafedralaryň we hünärleriň taryhy barada gyzykly maglumatlaryň ýerleşdirilenligidir. Özi-de saýtlaryň ählisinde diýen ýaly maglumatlar üç dilde — türkmen, iňlis we rus dillerinde berilýär.
