Gowaça ekişi öndürijilikli barýar

Oba hojalyk
24 Aprel 2024
406

Oba hojalygynda gyzgalaňly möwsüm bolan gowaça ekişi Köneürgenç etrabynda hem üstünlikli dowam edýär. Etrabyň «Watan» daýhan birleşiginiň pagtaçy kärendeçileri «Pähim-paýhas ummany Magtymguly Pyragy» ýylynda 1275 gektar ýerde ekiş geçirip, «ak altynyň» bereketli hasylyny almagy maksat edinýärler. Irki ekişiň ýokary hasyl almagyň gözbaşy bolup durýandygyna oňat düşünýän ýer eýeleri bu jogapkärçilikli möwsümi gysga möhletde amala aşyrmak üçin yhlaslaryny gaýgyrmaýarlar. Daýhan birleşiginde kärendeçiler toparynyň 15-si bolup, häzirki wagtda Dowul Dolanowyň ýolbaşçylygyndaky 9-njy hem-de Gurbangeldi Arazowyň baştutanlygyndaky 10-njy kärendeçiler toparlarynda gowaça ekişi has ýokary depginde dowam edýär. Pagtaçy kärendeçileriň arasynda Döwlet Mamalakow, Mährijemal Artykowa, Tirkeş Arazow, Ýagmyr Ýagmyrow ýaly toprak bilen iş salyşmakda tejribesi ýetik, gowaçadan bereketli hasyl almakda köplere görelde görkezýän guýmagursak daýhanlaryň ençemesi bar. Ekişe taýýar edilen ýerleri agrotehnikanyň talaplaryna laýyk sürmekde, ekiş geçirmekde etrap «Obahyzmat» önümçilik kärhanasynyň mehanizatorlary Şyhmyrat Myradow, Baýramgeldi Halbaýew, Baýram Geldiýew, Hydyr Gulamow dagy aýratyn gaýratlylyk görkezýärler.

Annageldi BEKIÝEW,
öz habarçymyz.
Beýleki habarlar