Arkadagly Gahryman Serdarymyzyň parasatly baştutanlygynda eziz Diýarymyzyň her bir güni ösüş-özgerişlere, toý-baýramlara beslenýär. «Pähim-paýhas ummany Magtymguly Pyragy» ýylynyň bahar paslynyň şatlykly günleriniň buýsançly wakalary bu hakykaty nobatdaky gezek tassyklaýar.
Milli bahar baýramynyň — Halkara Nowruz gününiň dabaralarynyň yzysüre Birleşen Milletler Guramasynyň Baş Assambleýasynyň 78-nji sessiýasynyň 63-nji plenar mejlisinde Türkmenistanyň başlangyjy esasynda «2025-nji ýyl — Halkara parahatçylyk we ynanyşmak ýyly» atly Kararnamanyň biragyzdan kabul edilendigi baradaky hoş habaryň gelip gowuşmagy, dünýäniň çar künjünden alymlaryňdyr döredijilik işgärleriniň, doganlyk halklaryň sungat ussatlarynyň gatnaşmagynda gadymy Änew topragynda uly dabaralaryň guralmagy ildeşlerimiziň göwün guşuna ganat baglap, syýasy, ykdysady we medeni taýdan galkynýan Watanymyzyň halkara abraýyny has-da artdyrdy.
