Daýhan maşgalasynda kemala gelen Jemile bu gün hem hemişeki endigine eýerip, ir bilen kärende ýerine tarap ugrady. Ol ekiş geçirilen meýdanlarda hatar tutup oturan gowaçaly meýdanlaryň bir gyrasynda saklandy-da, töwerege ser saldy. Patrak deýin açylan «ak altynlara» gözi düşen Jemile ýakymly ýatlamalara berildi. Ýaz gününiň ýuwaşjadan öwüsýän sergin şemaly jana ýakymly bolup, gowaçalaryň başlaryny çalaja yraýardy. Kadaly gögeriş gazanyp, hatar tutup oturan gowaçalar garyş boýundan geçipdi. Ýekelenip, haşal otlardan arassalanan meýdanlarda hatarara bejergi işleriniň geçirilmegi meýdanlary has-da görke getirýärdi. Bu pursatlary synlap duran daýhan zenan Jemile Akyýewa geljekki edilmeli işler barada pikir ýüwürdýärdi.
Ol gowaçalaryň hatararasynda keş geçirmek bilen bir hatarda, goşmaça iýmitlendirmegi has möhüm hasaplady. Gowaçaly meýdanlara aýlanyp çykyp, kärendeçilik toparynyň ýolbaşçysy bilen duşuşyp, onuň bilen ertirki günüň iş-aladasy hakda maslahatlaşdy. Orta atylan teklip makullanyp, topar ýolbaşçysy hem bu işiň aýny wagtydygyna göz ýetirdi. Dessine toparyň kärendeçileriniň ekin meýdanlaryna tejribeli mehanizator Dörtguly Akyýewyň ugradylmagyny makul bildi. Ine, sanlyja günüň içinde gowaçalara ideg işleriniň öz wagtynda göwnejaý ýola goýulmagy kärendeçi zenanyň işiniň has ugrukmagyna öz täsirini ýetirdi. Günsaýyn ösýän gowaçalaryň gül görkezip başlandygyna kärendeçi zenan öz ýanyndan begenip, ertirki güne has ynamly garady.