Hormatly Prezidentimiziň pagta ýygymyna girişmäge ak pata bermegi bilen 9-njy sentýabrda Ahal, Balkan, Lebap we Mary welaýatlarynda bu möhüm işe badalga berildi. Toprak-howa şertlerine laýyklykda, pagta ýygymy Daşoguz welaýatynda 15-nji sentýabrda başlanar.
Ýurdumyzyň oba zähmetkeşleri bu jogapkärli möwsüme toý ruhunda badalga berdiler. Welaýat merkezlerinde jogapkärli möwsüme bagyşlanan usuly maslahat geçirildi. Onda şu ýylda daýhan yhlasy bilen ýetişdirilen gowaça hasylyny guramaçylykly, ýitgisiz ýygnamak, harmanhana daşamak, pagta kabul ediş kärhanalarynda we hasyly daşaýan tehnikalarda ýangyn howpsuzlygynyň düzgünlerini berjaý etmek, möwsümiň dowamynda daýhanlar bilen tabşyrylan hasyl üçin hasaplaşyklary geçirmek dogrusynda gürrüň edildi.
