Sarahs etrabynyň S.A.Nyýazow adyndaky daýhan birleşiginiň hasyl ussatlary Arkadag Serdarly bagtyýar ýaşlar ýylynda 1 müň 380 gektar meýdana gowaça ekip, ýokary hilli gögeriş gazandylar. Daýhan birleşiginiň daýhanlary şu günler gowaçaly meýdanlary haşal otlardan arassalamak, olaryň hatarara bejergi işlerini alyp barmak, mineral dökünler bilen iýmitlendirmek, siňňitli suw tutmak ýaly möhüm agrotehniki çäreleriň ýokary hilli geçirilmegine uly ähmiýet berýärler.
Serdar Meretgulyýew tarapyndan ýolbaşçylyk edilýän 1-nji kärendeçilik toparynda kärendeçi maşgalalaryň gowaçalara ýokary hilli ideg etmekdäki asylly işleri bilen tanşanyňda pagtaçylaryň bol hasyl ýetişdirmek bilen üstümizdäki şanly ýylymyzy üstünlikli jemlemegi maksat edinýändiklerine göz ýetirmek kyn däl. Toparyň kärendeçileri 150 gektar meýdanda gowaçanyň bitginli hasylyny kemala getirmek bilen alynjak hasylyň mukdaryny gektardan 30 sentnere ýetirmegi borç edinýärler.
