Ynsan ýaşaýşynyň zerur iýmiti bolan mukaddes çöregiň undan, unuň bolsa bugdaýdan önýändigini biziň her birimiz bilýäris. Biziň keramatly ene topragymyz bar. Bu bereketli toprakdan bol hasyl almak bagtdyr. Häzirki ajaýyp döwrümizde hormatly Prezidentimiz oba hojalyk ulgamyny özgertmek, ösdürmek babatda uly tagalla edýär. Şonuň netijesinde gallaçy daýhanlara döwlet tarapyndan ýeňillikli goldawlar berilýär. Häzirki zamanyň kämil, kuwwatly traktorlarydyr kombaýnlary, oba hojalyk gurallary bilen üpjün edilýär. Oba hojalyk önümleriniň döwlet satyn alyş nyrhlary ýokarlandyrylýar. Kärendeçileriň yhlasly, netijeli zähmet çekmegi üçin şeýle mümkinçilikleriň döredilmegi öndürilýän oba hojalyk önümleriniň artmagyna itergi berýär.
«Balkangallaönümlerine» degişli kärhanalarda, galla kabul ediş nokatlarynda ýetişdirilen hasyly kabul etmäge hem-de talabalaýyk saklamaga ähli mümkinçilikler döredildi. Kabul edilen hasyl galla kabul ediş nokatlaryndan ammarlara, kuwwatly elewatorlara daşaldy.