Türkmen topragy — bereketli toprak. Munda önýän önümler saçaklarymyzy süýji nygmatlar bilen doldurýar. Daýhanlaryň maňlaý deri bilen ýetişdiren bol hasyly — halkyň rysgaly, baýlygy, toý saçaklarymyzyň bezegi. Bugdaý sözüniň özünde mukaddeslik jemlenendir. Muny onuň bilen bagly döredilen nakyllar, aýtgylar, rowaýatlar hem subut edýär. «Bugdaý nanyň bolmasa, bugdaý sözüň ýokmudy», «Bugdaýy bolmadygyň, ýagdaýy bolmaz» ýaly çuň manyly atalar sözlerini halkymyz ýöne ýere döreden däldir. «Daýhandan hereket — ýerden bereket» diýlişi ýaly, bu ýyl hem bugdaý hasyly bereketli boldy. Ak bugdaýyň mekany hasaplanýan Ak bugdaý etrabynyň daýhanlary hem şu ýyl bugdaýyň bol hasylyny ýetişdirdiler. Gahryman Arkadagymyz «Bugdaýly» daýhan birleşigine baryp, kärendeçileriň ýetişdiren bugdaý hasylyny synlady. Kärendeçi Ç.Annaýew bilen bugdaýyň dürli görnüşleri, olaryň hasyllylygy barada söhbetdeş boldy. Bugdaý oragynyň depgini bilen gyzyklandy. Bu görnüşleri synlamak bizde ýakymly duýgulary döretdi.
Biziň maşgalamyz hem daýhançylyk bilen iş salyşýar. Ogullarym ene topraga hyzmat edip, bugdaýyň bol hasylyny ýetişdirdiler. Olar bugdaýyň ýokary hilli görnüşini ekip, bugdaý hasylyny galla harmanyna tabşyrdylar. Gözüňi dokundyrýan bugdaý hasylyny görüp, begenjimiziň çägi bolmady. Dok däneleri ýygnap ýören kombaýnlaryň bugdaý daşaýan tehnikalara guýýan pursady ene hökmünde depämi göge ýetirdi. Men şeýle mukaddes önümiň öndürilişine öz balalarymyň goşandynyň barlygyna guwanýaryn. Ýaýlyp ýatan giň meýdanlarda öndürilýän bol hasyl ýurduň baýlygydyr.
