Ak bugdaý etrabynyň “Üzümli toprak” daýhan hojalygy gallaçylykda arzyly sepgide ýetdi. Mukaddes Garaşsyzlygymyzyň şanly 32 ýyllygynyň giňden dabaralandyryljak ýylynda tejribeli daýhan Annageldi Annaýewiň ýolbaşçylyk edýän bu daýhan hojalygy boýunça 89 gektarda ak ekiniň ýokary hasyly ýetişdirilip, şonça meýdandan guşgursak bugdaýyň 272 tonnadan gowragy taýýarlanyp, her gektaryň hasyllylygy 37 sentnere ýetirildi.
Daýhan hojalygynyň ýolbaşçysynyň aýtmagyna görä, dänäniň “batko” görnüşi ýerli toprak-howa şertlerinde oňat hasyl bermäge ukyplydyr. Munuň şeýledigine üstümizdäki şanly ýylda ýetişdirilen bol hasyl ýene-de bir gezek şaýatlyk edýär. Häzirki günlerde hasyly ýygnalan meýdanlardan samany ýygnap almak we topragy geljekki hasyla taýýarlamak işleri dowam edýär.
