Şanly wakalara beslenýän «Pähim-paýhas ummany Magtymguly Pyragy» ýylynda Gahryman Arkadagymyzyň Russiýa Federasiýasynyň Tatarystan Respublikasyna amala aşyran iş sapary taryhy pursatlara baý boldy. Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň bu ýerde «Russiýa — Yslam dünýäsi: Kazan Forum — 2024» XV halkara ykdysady forumyna hormatly myhman hökmünde gatnaşyp, onda eden taryhy çykyşy dünýä jemgyýetçiliginde uly gyzyklanma döretdi. «Ynanyşmak we hyzmatdaşlyk» şygary bilen geçirilen bu foruma 80-den gowrak döwletiň, şol sanda Yslam Hyzmatdaşlyk Guramasyna agza ýurtlaryň 40-synyň, Russiýanyň sebitleriniň 83-siniň wekilleri gatnaşdylar. Gahryman Arkadagymyz forumdaky çykyşynda birnäçe oňyn başlangyçlary öňe sürdi. Şolaryň hatarynda parahatçylygyň, özara düşünişmegiň we ynanyşmagyň hatyrasyna yslam başlangyjyny işläp taýýarlamak baradaky teklibi ýurdumyzyň halkara gatnaşyklarynda öňe sürýän parahatçylyk, ynanyşmak we özara bähbitli hyzmatdaşlyk ýörelgelerinden ugur alýar.
Türkmen halkynyň Milli Lideri Gahryman Arkadagymyz bu forumda beýik söz ussady Magtymguly Pyragynyň döredijilik mirasynyň düýpli öwrenilýändigini we akyldaryň doglan gününiň 300 ýyllygy mynasybetli geçirilýän dabaralaryň giň gerime eýe bolýandygyny nygtady. Yslam dünýäsinde akyldar şahyryň goşgularynyň ähmiýeti hem-de doganlyk halklar tarapyndan beýik söz ussadyna goýulýan hormat-sarpa hakynda buýsanç bilen bellendi. Magtymguly Pyragynyň doglan gününiň 300 ýyllygy mynasybetli dünýä ýurtlarynda geçirilýän halkara çärelere ýokary baha berip, Milli Liderimiz: «Türkmenistanda şeýle goldawa ýokary baha berilýär we oňa diňe bir akyldarymyza däl, eýsem, tutuş türkmen halkyna hormat goýmagyň, Türkmenistan bilen ruhy-medeni gatnaşyklary pugtalandyrmaga hem taýýarlygyň nyşany hökmünde garalýar» diýip belledi. Gahryman Arkadagymyz bu ýerde bolmagynyň çäklerinde «Kazan EKSPO» halkara sergisine baryp, ondaky Türkmenistanyň pawilýonynda ýurdumyzyň ähli pudaklarynda, şol sanda hususy ulgamda ýetilen sepgitleri açyp görkezýän önümler, maglumatlar, wideoşekiller bilen tanyşdy. Ýurdumyzyň ykdysady mümkinçiliklerini açyp görkezmekde möhüm ähmiýete eýe bolan sergi daşary ýurtly hyzmatdaşlaryň ünsüni özüne çekdi.
