Türkmenistanyň Kärdeşler arkalaşyklarynyň  welaýat birleşmesi tarapyndan  «Zähmeti goramak sagdyn we howpsuz iş şertleriniň girewidir» atly çäre geçirildi. Onda Türkmenistanyň Kärdeşler arkalaşyklarynyň etrap, şäher birleşmeleri, kärdeşler arkalaşyklarynyň ilkinji guramalary, pudaklaýyn geňeşleri welaýatyň edara-kärhanalarynda zähmeti goramak hakyndaky Türkmenistanyň kanunçylygynyň ýerini ýetirilişine baha berdiler. Hususan-da, ähli iş orunlarynyň howpsuzlyk tehnikasynyň düzgünleri boýunça berk guralyşyna, zähmetiň ýokary öndürijiligine, zähmetiň sagdyn we howpsuz şertlerini üpjün edýän nusgalyk tertip-düzgüniň we arassaçylygyň berjaý edilişine, iş orunlarynyň we kärhananyň çäginiň  nusgalyk tertipde saklanylyşyna, zähmeti goramak boýunça görkezme-wagyz etme işiniň hiliniň gowulandyrylyşyna üns berildi. Netijede, «Balkansuwhojalyk» önümçilik birleşiginiň «Bereketsuwhojalyk» önümçilik dolanyşygy ýeňiji zähmet köpçüligi, «Nebitgazburawlaýyş» trestiniň zähmeti goramak we tehniki howpsuzlyk bölüminiň başlygy Kadyrberdi Dilegow ýeňiji tehniki-inžener hünärmen, Etrek etrap jemagat hojalygy müdirliginiň meýdan süpürijisi Täçbibi Sopyýewa önümçilikde has ýokary üstünlik gazanyp, zähmeti howpsuz alyp baran işçi diýlip yglan edildi. Olara Türkmenistanyň Kärdeşler arkalaşyklarynyň welaýat birleşmesi tarapyndan gymmatbahaly sowgatlar we Hormat hatlary dabaraly ýagdaýda gowşuryldy.