Halkara Bitaraplyk gününiň öňüsyrasynda Seýdi şäherinde 24 öýli dört gatly ýaşaýyş jaýy ulanylmaga tabşyryldy. Bagtyýar maşgalalaryň 24-si üçin bu baýramçylyk goşa şatlyk getirdi. Täze binanyň öňünde ýaňlanýan aýdym-sazyň ýakymly owazy jaý toýuna gatnaşyjylaryň şatlyklaryna şatlyk goşdy.
Täze, döwrebap ýaşaýyş jaýynyň açylyş dabarasyna il sylagly ýaşulular, kümüş saçly eneler, jemgyýetçilik guramalarynyň wekilleri gatnaşdylar. Olar täze mekanyň ýaşaýjylaryny bu şanly waka bilen gutladylar. Gutlaglarda hormatly Prezidentimiziň raýatlaryň gowy ýaşamaklary ugrunda ýöredýän ynsanperwer syýasaty, bitirýän beýik işleri üçin hoşallyk sözleri ýaňlandy. Garaşsyz döwletimizde raýatlaryň bähbitleri göz öňünde tutulyp, amala aşyrylýan işleriň jümle-jahany haýrana goýýandygy guwanç bilen bellenildi. Bu gün bagtyýarlyk mekanyna öwrülen Türkmenistanda raýatlaryň ruhubelent işlemekleri we bolelin durmuşda ýaşamaklary üçin ähli şertler döredilýär.
