Garaşsyz, hemişelik Bitarap Türkmenistan halkara parahatçylygyny, howpsuzlygy, durnukly ösüşi üpjün etmekde dünýäde belent abraýa eýe bolmak bilen, baý döredijilik kuwwatyny tutuş adamzadyň bähbidine gönükdirmäge çalyşýar. Berkarar döwletiň täze eýýamynyň Galkynyşy döwründe Türkmenistanyň halkara giňişlikdäki işjeňligi barha artýar. Häzirki döwürde birnäçe ýurt bilen diplomatik gatnaşyklary ýola goýdy. Birleşen Milletler Guramasynyň Nýu-Ýorkdaky, Ženewadaky we Wenadaky ştab-kwartiralarynda Türkmenistanyň öz hemişelik wekilhanalary bar. Biziň ýurdumyz halkara guramalarynyň 50-ä golaýynyň agzasy bolup durýar. Şol bir wagtda Türkmenistan 150-den gowrak halkara konwensiýalara, şertnamalara we beýleki köptaraplaýyn resminamalara gatnaşýar.
Döwletimiz parahatçylygyň, howpsuzlygyň, ösüşiň gazanylmagy ugrunda başlangyçlar bilen yzygiderli çykyş edýär. Sebitde hem dünýäde parahatçylygy we howpsuzlygy berkitmek Türkmenistanyň daşary syýasatynyň strategiki ugry bolup durýar. Munuň özi, bir tarapdan, Türkmenistanyň hemişelik Bitaraplyk hukuk derejesi bilen baglanyşyklydyr, beýleki bir tarapdan, howpsuzlygy we durnuklylygy üpjün etmek durnukly ösüş boýunça ählumumy meseleleri çözmegiň hökmany şerti bolup durýar.