Umumy bilim berýän orta mekdepleriň edebiýatdan okuw kitaplary boýunça türkmeniň beýik akyldar şahyry Magtymguly Pyragynyň ýegeniniň Gurbandurdy Zelili bolandygyny, onuň XIX asyryň görnükli nusgawy şahyrlarynyň biri bolmak bilen, daýysy Magtymgulynyň il-ýurt, agzybirlik, watansöýüjilik ýaly pikirlerini öz döwründe mynasyp dowam etdirendigini, şeýle hem Mollamurt şahyryň hem XVIII asyryň nusgawy şahyry Şeýdaýynyň ýegeni bolandygyny bilýäris. Munuň özi zandyňda bolsa, zehin, kesp-kär ýaly närseleriň diňe bir perzentlere däl, eýsem, doganyň perzentlerine, umuman, şahalaýyn nebereleriňe hem geçip bilýändigi hakyndaky pikire getirýär. Bu pikiri türkmen edebiýatyna şygyr düzmegiň täze özboluşly formalaryny getiren, liriki poeziýanyň ussady Rehmet Seýidow, onuň ýegeni, Türkmenistanyň halk ýazyjysy Öwlüýäguly Möwlamow barada hem ulansak tüýs ýerine düşerdi. Iň bolmanda, Watan, il-ýurt üçin uly hyzmatlary bitiren, iliň-günüň söýgüsine, hormatyna mynasyp bolan belli pederleriň özünden soňky nesilleri, nebereleri, ili-güni üçin ylham çeşmesi, ýeneki üstünliklere, ýenişlere ruhlandyryp, güýç berýän durnagöz suwly paýhas akabasy hökmünde hyzmat edýändigi barada pikir hem biçeme däldir. Çünki Rehmet Seýidow türkmen edebiýatynyň çeperçilik taýdan kämilleşmegine, ösmegine özüniň çuňňur lirizme ýugrulan şahyrana eserleri bilen saldamly goşandyny goşan bolsa, onuň ýegeni Öwlüýäguly Möwlamow özboluşly çeper kyssa eserleri bilen türkmen edebiýatynda öçmez yz galdyrmagy başardy. Onuň okyjylaryň ýüregine barýan inçejik ýodany tapan «Şahyryň ýaşlygy», «Lebap säheri», «Ýekäniň çaňy», «Pygan» ýaly kitaplarynyň çeperçilik gymmaty barada düýpli gürrüň etmegi ýazyjylaryň, edebiýatçylaryň paýyna goýup, onuň mähirden, aladadan doly nurana ýüzüni synlamak nesip eden günler, ýaşlara maslahatlaryny diňlemek miýesser bolan edebiýat birleşmelerindäki duşuşyklaryň käbiri hakyndaky ýatlamalarymy okyjylar bilen paýlaşasym gelýär. Onuň üçin bolsa, ilki bilen ýakymly we gyzykly ýatlamalardan doly mekdep ýyllaryma dolanmaly bolýaryn.
Edebiýat mugallymy babatynda meniň we synpdaşlarymyň Halaç etrabynyň 22-nji orta mekdebiniň okuwçylarynyň tüýs bagty getiripdi. Çünki bu dersden bizi obadaşymyz, şahyr mugallym Gurbangeldi Hojanyýazow okadýardy. Onuň her edebiýat sapagyna baýramçylyga garaşýan ýaly garaşardyk. Ol sapakda bizi şahyr-ýazyjylaryň gyzykly durmuşy, olaryň ýazan eserleriniň çuňňur many-mazmuny bilen ýakyndan tanyşdyrsa, ýurdumyzda çykýan gazet-žurnallarda ýygy-ýygydan çap edilip durýan goşgulary arkaly biz mähriban mugallymymyzyň eserleriniň şahyrana dünýäsine barha içgin aralaşýardyk. Türkmen okyjylaryna bäş sany goşgular kitabyny ýadygärlik galdyran, meniň okuwçy wagtym goşgy ýazmaga ilkinji synanyşyklarymy gowy sözleri bilen goldap, höweslendiren ilkinji halypam Gurbangeldi Hojanyýazow bize «Rehmet Seýidowyň ömri we döredijiligi» diýen temany geçende, ussat şahyryň Öwlüýäguly Möwlamow atly ýazyjy ýegeniniň hem bardygyny, onuň şahyr daýysy barada «Şahyryň ýaşlygy» diýen powestini ýazandygy hakynda gyzykly gürrüň beripdi. Ine, şeýdibem, paýhasly gözleri bilen äýneginiň aňyrsyndan seredip duran, okuw kitabynda yerleşdirilen goşgusyndaky: