Mähriban halkymyz «Türkmenistan — parahatçylygyň we ynanyşmagyň Watany» diýlip yglan edilen 2021-nji ýyly uly baýramçylyk dabaralaryna besläp, ruhubelentlik bilen garşylady. Däp bolşy ýaly, ýylyň ahyrynda ýerine ýetirilen işleriň jemleri jemlenilýär hem-de ýetip gelen ýylda täze wezipeler kesgitlenilýär.
Hormatly Prezidentimiz Gurbanguly Berdimuhamedow şu hepdäniň çarşenbe güni, Täze ýylyň öňüsyrasynda Ruhyýet köşgünde Ministrler Kabinetiniň we Döwlet howpsuzlyk geňeşiniň şu ýyl üçin bilelikdäki soňky mejlisini geçirdi.
