Ýakynda Ahal welaýatynyň sport we ýaşlar syýasaty müdirliginiň ýyllyk meýilnamasyna laýyklykda, woleýbol boýunça erkekleriň arasynda Ahal welaýatynyň çempionaty, Tejen we Gökdepe şäherlerinde sebit ýaryşlary geçirildi. Sebit ýaryşlaryna welaýatyň şäher we etraplaryndan 8 sany topar öz aralarynda bäsleşdiler we her sebit böleginde 1-2-nji orny eýelän toparlar jemleýji ýaryşa gatnaşmaga hukuk gazandylar.
Ýaryşyň dowam edýän döwürlerinde Änew şäherindäki sport mekdebinde woleýbol boýunça Ahal welaýatynyň çempionatynyň jemleýji tapgyry geçirildi. Sebitden 1-2-nji orny eýelän toparlar ýarym final duşuşyklaryna gatnaşdylar. Netijede, Tejen etrabynyň topary 3-2 hasabynda Bäherden etrabynyň toparyny, Babadaýhan etrabynyň topary hem 3-1 hasabynda Gökdepe etrabynyň toparyny ýeňip, final duşuşygyna çykdylar.
