Ýurdumyzda amala aşyrylýan giň gerimli özgertmeleri ylmy taýdan esaslandyrmak babatda kabul edilýän çözgütler oba hojalygynda-da üstünlikli durmuşa geçirilýär. Şundan ugur alnyp, S.A.Nyýazow adyndaky Türkmen oba hojalyk uniwersitetiniň Balkan welaýatyndaky Magtymguly ylmy-önümçilik synag merkezinde saglyk üçin ýokumly we ykdysady taýdan peýdaly miweli baglaryň dürli görnüşiniň ösdürilip ýetişdirilmegini ýola goýmakda, olardan alynýan önümleriň hojalyk hem-de biologik häsiýetlerini öwrenmekde maksada okgunly işler bitirilýär.
Geçen asyryň otuzynjy ýyllarynda döredilen bu merkezde ösümlikleriň medeniýetleşdirilen görnüşleriniň 2 müňe golaýy ösdürilip ýetişdirilýär. Häzire çenli medeniýetleşdirilen şänikli agaçlaryň 80, çigitli agaçlaryň 40, subtropik agaçlaryň 100 göterime barabary Diýarymyzyň çäklerindäki hojalyklara ýaýradyldy. Ýeri gelende aýtsak, subtropik baglaryň dürli görnüşiniň, şonuň ýaly-da üzümiň, naryň we gaýry çigitli agaçlaryň toprak-howa şertlerimize uýgunlaşyp, oňat hasyl berýän görnüşleriniň ylmy taýdan içgin öwrenilip, has amatlylarynyň önümçilige giňden ornaşdyrylmagynyň azyk bolçulygyny pugtalandyrmakdaky ähmiýeti juda ýokarydyr. Munuň özi hormatly Prezidentimiziň içerki bazarlary özümizde öndürilýän, ekologik taýdan arassa gök-bakja we miwe önümleri, ir-iýmişler bilen doldurmak baradaky tabşyryklaryny üstünlikli durmuşa geçirmäge-de giň mümkinçilikleri berýär.
