Berkarar döwletiň täze eýýamynyň Galkynyşy döwründe ýurdumyzda medeni diplomatiýa uly üns berilýär. Türki medeniýetiň halkara guramasyna (TÜRKSOÝ) agza ýurtlaryň teatr toparlaryny paýtagtymyzda jemlän II teatr festiwaly hem medeniýetleri baýlaşdyrmak, ýurtlaryň arasynda dostlukly gatnaşyklary berkitmek maksadyndan ugur alýar. Ol şu ýylda gadymy Änew şäheriniň «Türki dünýäsiniň medeni paýtagty» diýlip yglan edilmegi hem-de Magtymguly Pyragynyň doglan gününiň 300 ýyllygy mynasybetli guraldy.
Festiwal sahna sungatynyň wekilleriniň tejribeleri alyşmagy, ýaş teatr artistleriniň ýerine ýetirijilik ussatlygynyň ýokarlanmagy üçin ajaýyp mümkinçilik boldy. Ýurdumyzyň sungat ussatlary özleriniň edebi-çeper çykyşlaryny görkezdiler. Munuň özi ösüşlere beslenýän döwrümiziň döredijilik ruhunyň näderejede belentdedigini äleme äşgär etdi.
