Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda şanly geçmişde yklymlary birleşdiren Beýik Ýüpek ýoly täzeden dikeldilýär. Üçünji müňýyllygyň täze taryhyna altyn harplar bilen ýazylýan Beýik Ýüpek ýoly bu gün dünýäniň jahankeşdelerini, syýahatçylaryny, alymlaryny, bilermenlerini, işewürlerini ülkämize alyp gelýär. Türkmen halkynyň parahatçylyk söýüjilik, dost-doganlyk, myhmansöýerlik, hoşniýetli goňşuçylyk ýörelgelerini has-da dabaralandyrýar. Bu barada türkmen halkynyň Milli Lideri Gahryman Arkadagymyzyň «Türkmenistan — Beýik Ýüpek ýolunyň ýüregi» atly kitabynda: «Görnüşi ýaly, taryhyň ähli döwürlerinde Beýik Ýüpek ýolunyň şahalary, ak ýollar, bagt ýollary dünýäniň çar künjünden Zeminiň ýüregi Türkmenistanyň goýnuna gelýär. Keremli topragymyzdan gözbaş alýan dost-doganlyk ýollary, ykdysady hyzmatdaşlyk ýollary, syýahatçylyk ýollary yklymlara tarap ynamly gadam basýar» diýlip bellenilýär. Muňa Arkadag Serdarly bagtyýar ýaşlar ýylynyň 20 — 22-nji martynda ýurdumyzda «Türkmenistanda syýahatçylygy ösdürmegiň esasy ugurlary we mümkinçilikleri» atly halkara maslahatyň geçirilmegi hem aýdyň şaýatlyk edýär.
Bilşimiz ýaly, paýtagtymyzyň gözel künjeginde ýerleşýän «Arçabil» myhmanhanasynyň mejlisler zalynda geçirilen maslahata dünýäniň onlarça döwletinden hyzmatdaşlar, syýahatçylyk kompaniýalarynyň ýolbaşçylary, jahankeşdeler gatnaşdylar. Onda Russiýa, Bolgariýa, Horwatiýa, Hytaý, Koreýa, Eýran, Türkiýe, Özbegistan, Gyrgyzystan ýaly döwletlerden gelen wekiller çykyş etdiler. Şeýle-de Türkmenistanyň Medeniýet ministrliginiň Syýahatçylyk müdirliginiň, «Bagtyýar dostlar», «Owadansyýahat», «Jahankeşde» hususy kärhanalarynyň wekilleriniň çykyşlary diňlenildi.
