— Men Türkmenistanda amala aşyrylýan her bir işe uly guwanç bilen seredýärin. Häzirki wagtda Türkmenbaşy Halkara deňiz portuna gyzyklanma bildirýän biržalar, banklar köp. Bu babatda Bütindünýä bankyny mysal alsak, ýeterlikmikä diýýärin. Türkmenbaşy Halkara deňiz portunyň mümkinçiligi uly. Balkan welaýaty senagat taýdan ösýän sebit. Gyýanly şäherçesinde öndürilýän polietilen we polipropilen önümlerini, Garabogaz şäherindäki karbamid önümlerini eksporta äkitmek üçin uly güýç gerek. Şonuň üçin hem dünýäniň öňdebaryjy ulag-logistika kompaniýalarynyň ünsi Türkmenistanda.
Häzirki wagtda Türkmenistan dünýä ýurtlary bilen söwda-ykdysady, ulag-logistika, maýa goýum ýaly ugurlarda netijeli gatnaşyklaryň çuňlaşdyrylmagyna we hyzmatdaşlygyň ugurlarynyň giňeldilmegine möhüm ähmiýet berýär. Ýurduň döwlet Baştutanynyň amala aşyrýan durmuş ugurly döwlet syýasatynyň netijesinde Türkmenistan bu ugurlarda uly üstünlikleri gazanýar.