Dünýä Ralli çempionatynda möwsümiň iň soňky, 13-nji ýaryşy Ýaponiýanyň Çubu sebitinde geçirildi. «Toyota» stadionyndan başlanan 22 tapgyrdan ybarat bolan ýaryşda 304,66 kilometr aralygy «Toyota Gazoo» toparynyň britaniýaly sürüjisi Elfin Ewans 1-nji orunda tamamlady. 3 sagat 32 minut 08,8 sekuntda pellehana gelen Ewans karýerasy boýunça 8-nji ýeňşini gazandy. Ýaryşda 2-nji ýere «Toyota Gazoo» toparynyň başga bir sürüjisi, fransiýaly Sebastian Ožie, 3-nji orna-da çempionlygyny öň yglan eden finlýandiýaly Kalle Rowanpera mynasyp boldy. Şunlukda, «Toyota Gazoo» topary öz ýurdunda münberiň 3 basgançagyny hem eýeledi.
51-nji gezek geçirilen Dünýä Ralli çempionatynda «Toyota Gazoo» toparynyň finlýandiýaly sürüjisi 250 utuk toplap, bassyr 2-nji çempionlygyny gazandy. Elfin Ewansyň 2-nji ýeri eýelän möwsüminde belgiýaly Tierri Noýwill («Hyundai Shell Mobis») 3-nji orna mynasyp boldy.