Arkadag şäheri — bagtyň şäheri, päkize hem halal ähtiň şäheri. Bu şäher söýgetdir ömre, ykbala, bu şäher göwnüňi salar hoş hala. Ak binalar monjuk kibi düzülen, käte Arşdan kümüş damja üzüler. Uzalyp barýandyr jaýlaň hatary, çünki bu ak şäher — bagtyň açary. Binalary saýyrdyňdyr, aýdyňdyr, Arkadag şäheri mukam, aýdymdyr. Sungat ojaklary göwher gaş deýin, binalary syrdam, mähek daş deýin. Toýa baýdyr bu şäheriň gujagy, misli Aýdyr bu şäheriň gujagy. Her binasy ajaýyp bir taslama, Arkadagyň paýhasyndan taslana, döredi bir ajap, hoşsurat şäher, jemaly güýz kibi, kemaly mähir. Goýny-çägi beslenendir güllere, durky şygyr bagyş eder dillere. Bilim ojaklary ylma örklenen, sungat ojaklary täsin görklenen. Gezim etseň şaýollaryna birsellem, göwün ganat kakyp, gökde pelpellär.
Sebitde akylly şäher, Arkadag — kamaty ýakymly şäher. Howasy bar jana melhem bu şäheriň, güwäsi bar göwne ylham bu şäheriň. Akly-gyzyl güller köňle teselli, bakdym men olara, göwnüm eseldi. Gözellik bendiwan eder her kesi, täsin görner ýanýodada nerkesi. Agşamlaryna Aý şuglasyn paýradar, gije nurun çar tarapa ýaýradar. Bakdygyňça, geler şäher hoşuňa, ol ganat bagladar göwün guşuňa. Maýsalary mymyk misli pamyk deý, gunçalary ýaryp çykýan gämik deý. Owadan, Arkadag şäheri owadan, süňňündäki kerem-mähri owadan. Hemmeler bu ýere ederler seýran, hemem görmegine galarlar haýran. Döwrebap nusgaly täze şäher ol, köňüllerde soňlanmajak bahar ol. Gahryman Arkadag paýhasy bilen, şäherler içinde naýbaşy bolan, bu şäheriň waspyn bolmaz gutaryp, göwünleri barýar göge göterip. Binalarynyň hersi täsin ülňüde, gülleri kän gyzyl, elwan, gülgüne.
