Türkmenabat şäherindäki «Aý-Gün» toý mekanynda Türkmenistanyň Demokratik partiýasynyň welaýat, etrap we şäher komitetleriniň bilelikde guramaklarynda Halkara Bitaraplyk güni we Türkmenistanyň Demokratik partiýasynyň döredilmeginiň 33 ýyllygy mynasybetli baýramçylyk dabarasy geçirildi. Oňa il sylagly ýaşulular, kümüş saçly eneler, partiýanyň öňdebaryjy agzalary, welaýatymyzyň dürli pudaklarynyň zähmetkeşleri gatnaşdylar.
Dabarada bagtyýar ildeşlerimiziň baýramçylyk gutlaglary, ýürek buýsançlary diňlenildi. Çykyşlarda ýurdumyzyň hemişelik Bitaraplyk ýörelgeleriniň tutuş dünýäde parahatçylygy, abadançylygy, durnukly ösüşi üpjün etmäge giň ýol açýandygy uly buýsanç bilen nygtaldy. Dabaranyň dowamynda «Pähim-paýhas ummany Magtymguly Pyragy» ýylynda hormatly Prezidentimiziň Berkarar döwletiň täze eýýamynyň Galkynyşy döwründe alyp barýan beýik özgertmeler syýasatyny, il bähbitli, ýurt ähmiýetli tutumlaryny, täze başlangyçlaryny halk köpçüligine düşündirmek, wagyz-nesihat etmek hem-de Türkmenistanyň Demokratik partiýasynyň şäher we etrap komitetleriniň partiýa hataryny ösdürmek, ony guramaçylyk taýdan pugtalandyrmak, ilkinji partiýa guramalarynyň işlerini has-da kämilleşdirmek maksady bilen yglan edilen «Ýylyň göreldeli wagyzçysy», «Göreldeli partiýa guramaçysy», «Öňdebaryjy partiýa komiteti» atly bäsleşikleriň jemi jemlenildi. Bäsleşigiň netijeleri boýunça Türkmenistanyň Hormatly il ýaşulusy, Hojambaz etrabynyň ýaşaýjysy Bazar Şalyýew, Türkmenistanyň Hormatly il ýaşulusy, Saýat etrabynyň ýaşaýjysy Hemraguly Agalyýew we Türkmenistanyň Demokratik partiýasynyň Dänew etrap komitetiniň bölüm müdiri Saýýara Jumadurdyýewa «Ýylyň göreldeli wagyzçysy» bäsleşiginiň ýeňijileri boldular. «Göreldeli partiýa guramaçysy» bäsleşiginiň jemi boýunça Türkmenistanyň Demokratik partiýasynyň Dänew etrap komitetiniň partiýa guramaçysy Sülgün Jumaýewa, Türkmenistanyň Demokratik partiýasynyň Darganata etrap komitetiniň partiýa guramaçysy Bagtygül Ernazarowa we Türkmenistanyň Demokratik partiýasynyň Türkmenabat şäher komitetiniň partiýa guramaçysy Yhlas Geldimyradow baýrakly orunlary eýelediler. Partiýanyň Dänew, Saýat we Hojambaz etrap komitetleri bolsa «Öňdebaryjy partiýa komiteti» bäsleşiginiň ýeňijileri diýlip yglan edildi.
