Çärjew etrabynyň «Lebap» daýhan birleşiginiň çägindäki aňyrsyna-bärsine göz ýetmeýän «ak altynly» pelleri synlanymyzda, ene ýere bagry badaşan daýhanlaryň yhlasly zähmetiniň ýerine düşendigine göz ýetirýäris. Pagta ýygymy möwsüminde oba ilatynyň esasy maksady ýetişdirilen hasyly gysga döwürde ýygnap, Watan harmanyna tabşyrmaklyga gönükýär. Olar ir säherden giç agşama çenli maňlaý derini döküp, her iş gününi üstünlikli jemlemäge çalyşýarlar.
Häzirki gyzgalaňly günlerde kärendeçileriň şertnamalaýyn borçnamalaryny ýerine ýetirendiklerini buşlaýan habarlaryň hem yzy üzülmeýär. Şu oba hojalyk ýylynda etrapda, esasan hem, gowaçanyň «Ýolöten-39», «S-2606» görnüşleri ekilip, öz wagtynda geçirilen agrotehniki çäreler oňyn netije berýär.
