Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň öňdengörüjilikli belent maksatlarynyň netijesinde ýurdumyzyň durmuşyna giň gerimli özgertmeleriň örän çalt depginlerde ornaşdyrylmagy, gerimi we ähmiýeti jähetden geljegi nazarlaýan möhüm işleriň üstünlikli amala aşyrylmagy beýik ösüşleriň milli ulgamyny kemala getirdi we netijeliligini äşgär etdi. Berkarar Diýarymyz ykdysady taýdan kuwwatly ýurtlaryň hataryna goşuldy. Welaýatlarymyzyň ählisinde täze döwrebap etraplar, şäherçelerdir obalar emele geldi. Ýurdumyzyň şäherleriniň we obalarynyň binagärlik keşbi düýpli özgerdi, olarda ähli amatlyklary bolan ýaşaýyş jaýlary, täze mekdepler, çagalar baglary, lukmançylyk merkezleri, medeniýet köşkleri, stadionlar, şypahanalar we beýleki durmuş-ykdysady maksatly desgalar guruldy.
Gojaman Köpetdagyň ajaýyp eteginde türkmen döwletiniň ösüşlerini, täze gazananlaryny, tehniki öňegidişliklerini dabaralandyrýan täze Arkadag şäheri döredi. Ak şäherimiz Aşgabatda gurlan Medeniýet şäherçesiniň, Olimpiýa şäherçesiniň we ýurduň günbatarynda gojaman Hazaryň kenarynda döredilen «Awaza» milli syýahatçylyk zolagynyň ajaýyp binagärligi, gözelligi bu gün dünýäniň halklaryny dostluga, doganlyga, medeni we ykdysady hyzmatdaşlyga çagyrýan türkmeniň kämil garaýşyny, köňül arzuwyny, gözel kalbynyň owazyny alamatlandyrýar. Olarda mähriban halkymyza döredijilikli zähmet çekmäge, ýaşamaga we ylym-bilim almaga ähli şertler döredildi. Bularyň ählisiniň bitewülikde ýurdumyzyň mundan beýläkki ösüşlerine kuwwatly itergi berýändigi hakynda pikirleneniňde bolsa, Gahryman Arkadagymyza, Arkadagly Gahryman Serdarymyza alkyş-hoşallygyň, buýsanjyň artýar. Gurmagyň we döretmegiň röwşen ýoly häzirki wagtda peder ýoluny üstünlikli dowam etdirýän hormatly Prezidentimiziň belent maksatlary bilen uly rowaçlyklara beslenýär.
