Berkarar döwletiň täze eýýamynyň Galkynyşy döwrüniň il-ýurt bähbitli ýol-ýörelgelerini doly kemala getirmekde, ony milli aňyýetiň mazmunyna ornaşdyrmakda we halkyň ruhy ýaşaýşyna oňyn täsir etmekde ylym-bilimiň örän uly ähmiýeti bardyr. Hormatly Prezidentimiziň tagallasy bilen bilim ulgamy döwrebap ösdürilýär we ýaş hünärmenler kemala gelýär. Bu günki ýaşlara gadymdan gelýän milli ýörelgelerimiz ylmy esasda öwredilýär. Berkarar döwletiň täze eýýamynyň Galkynyşy döwrüniň «Halkyň Arkadagly zamanasy» ýyly türkmen jemgyýetiniň durmuşyna ýalkym çaýýar. Taryhyň sahypalaryna ser salanymyzda, ata-babalarymyzyň ösen medeniýetleri döredendiklerine, ylym-bilimiň ösmegine goşant goşandyklaryna, döredijilikli ýaşamagy başarandyklaryna aýdyň göz ýetirýärsiň.
Ruhy tämiz, kalby päk, ahlagy arassa, dünýägaraýşy giň, süýji dilli, halallygy hemişe özüne ýaran edinen ýaşlary terbiýeläp ýetişdirmek hormatly Prezidentimiziň ýurtda amala aşyrýan beýik işleriniň özenini düzýär. Ýaşlary watançylyk ruhunda terbiýelemekde kämil terbiýäniň, kämil bilimiň binýady dilden, sözleýiş medeniýetinden başlanýar. Sebäbi ynsan gözelligi şirin dilden, kalby päklikden gözbaş alýar. Ýaşlarda ene dilimize söýgi döretmek, olaryň köp dil bilmeklerini üpjün etmek häzirki döwrümiziň möhüm wezipesidir. Şeýle hem ýaşlara häzirki zamanyň ösen tehnologiýalaryny öwretmegiň ähmiýeti uludyr. Bu tehnologiýalar ýaşlaryň kämil hünärmenler bolmaklaryna oňat ýardam edýär.
