Gahryman Arkadagymyzyň «Parahatçylyk sazy, dostluk, doganlyk sazy» atly kitabynda halklaryň arasyndaky medeni, sungat ugrundaky gatnaşyklaryň kökleri asyrlaryň aňyrsyndan gözlenilýär. Bu gatnaşyklary düşünişmek köprülerini gurmaklyga deňemek bilen kitapda: «Biziň günlerimizde şeýle wezipäni daşary ýurtlarda we biziň ýurdumyzda geçirilýän Medeniýet günleri, ylmy maslahatlar, döredijilik festiwallary, sergiler we beýleki maslahatlar ýerine ýetirýär» diýlip bellenilýär. «Pähim-paýhas ummany Magtymguly Pyragy» ýylymyz hem boýdan-başa halklaryň arasyndaky dostluk köprüleriniň süňňüni berkitmeklige bagyşlandy. Änew şäheriniň 2024-nji ýylda «Türki dünýäsiniň medeni paýtagty» diýlip yglan edilmegi, şeýle-de akyldar şahyrymyz Magtymguly Pyragynyň doglan gününiň 300 ýyllygy mynasybetli ýylyň dowamynda geçirilen halkara derejesindäki çäreler, dabaralar dostlukly ýurtlaryň medeniýet, sungat işgärlerini Garaşsyz Diýarymyzda jemledi.
Golaýda, has takygy 16-njy noýabrda Änew şäheriniň 2024-nji ýylda «Türki dünýäsiniň medeni paýtagty» diýlip yglan edilmegi mynasybetli geçirilen çäreleri jemlemek bilen baglanyşykly dabaralar gül Watanymyzy ýene-de gülzarlyga besledi. Hormatly Prezidentimiz bu çärelere gatnaşyjylara iberen Gutlagynda: «Häzirki döwürde TÜRKSOÝ-na agza ýurtlaryň arasynda hoşniýetli halkara hyzmatdaşlyk netijeli ösdürilýär, dostlukly ýurtlarda geçirilýän halkara çärelere medeniýet we sungat işgärleri işjeň gatnaşýarlar, özara tejribe alyşýarlar. Munuň özi türki dünýäde kemala gelen dost-doganlyk gatnaşyklarynyň binýadyny has-da berkidýär» diýip bellemek bilen, onuň ähmiýetine ýokary baha berýär.
